நீங்கள் சொல்கிறீர்கள்
நான் சொல்லாதிருக்கிறேன்
நீங்கள் விமர்சிக்கிறீர்கள்
நான் மௌனம் கொள்கிறேன்
நீங்கள் அழுகிறீர்கள்
நான் இதயத்தினுள்ளே காய்கிறேன்
நீங்கள் சொப்பனம் காண்கிறீர்கள்
நான் உறக்கத்திலும்
உணர்வோடிருக்கிறேன்
நீங்கள் புகழ்வதைப் புகழென்று
நினைக்க
நான் அமைதியைப்
பலமென்று நினைக்கிறேன்
எனது பாதை எனக்கானது
உமது பாதை உமக்கானது
இருத்தலின் சாட்சியாக
எனக்கும் உங்களுக்கும்
வித்தியாசங்கள் பல
சுட்டெரிக்கும் வெயிலுக்கு
சொகுசுக்குடையில்
இளநீர் குடிக்கும் நீங்கள்
ஆகாயக்குடையின் கீழ்
நிழலைத் தேடுமென்னை
அறிந்திருக்கக் கூடுமா?
விதைத்து விட்டு
மழைக்காகக் காத்திருக்கும்
ஏழை நான் விட்டேத்தியாக
இருப்பது நீங்கள்தான்
விபரிக்க வேண்டும்
என்று அவசியமில்லை
பரபரக்கும் பழக்கமும் எனக்கில்லை
பேசிப்பேசிக் கொல்வதை விட
அமைதியில் சிறு நிம்மதி
கொடுக்க முயற்சிக்கலாம்
ஒவ்வொரு காலமும்
ஒவ்வொரு ஞாபகங்கள்
ஒவ்வொரு நொடியும்
பலப்பல யாகங்கள்
அதையெல்லாம் அவசியமின்றி
அம்பலப்படுத்த முடியாமல் நான்
அதீதங்களின் பிடியில்
அநாவசியங்களின் கொடியுடன் நீங்கள்
அவரவர்க்குள் புதைந்த இரகசியங்கள்
அவரவர்க்குள் மாத்திரம்
இருக்கட்டும்
அவரவர்க்கான வேதனைகளும்
சுகமான நொடிகளும்
உள்ளார்ந்து நினைந்து
கொள்ளப்படுவதே
போதுமானது
கல்லெறிகளை
முதலில் நிறுத்துங்கள்
கழிம்பு தரத் தேவையில்லை
காயங்கள் தானாக ஆகும்.
