இந்த நாட்டிலுள்ள அனைத்து பெண்களினதும் பிரதிநிதி நான்

நான் நாட்டிலுள்ள அனைத்து பெண்களையும் பிரதிநிதித்துவப்படுத்தியே அரசியலில் செயற்பட்டு வருகின்றேன். அதில் தமிழ், சிங்களம், முஸ்லிம் என்ற எந்த பாரபட்சமும் கிடையாது என்கிறார் மகளிர் மற்றும் சிறுவர் விவகார அமைச்சர் சரோஜா சாவித்திரி போல்ராஜ். தினகரன் வாரமஞ்சரிக்கான நேர்காணலிலேயே அவர் இதனைத் தெரிவித்தார்.

அவரது நேர்காணல் முழுமையாக….

கேள்வி: சிறுவர் துஷ்பிரயோகங்கள் என்ற விடயத்தில் அதிகளவில் பாடசாலை மாணவர்கள் பாதிக்கப்படுகின்றார்கள். இந்நிலையில் பாலியல் கல்வி (Sex education) தொடர்பான அறிவு மாணவர்களுக்கு வழங்கப்பட வேண்டுமென அதிகளவில் பேசப்பட்டு வருகின்றது. இது தொடர்பான நடவடிக்கைகள் தனியார் பாடசாலைகளில் ஓரளவேனும் உள்ளபோதிலும் அரசாங்க பாடசாலைகளில் உள்ளதா என்பது கேள்விக்குறியாகவே உள்ளது. Sex education மாணவர்களுக்கு எவ்வளவு தூரம் முக்கியமானது என நினைக்கின்றீர்கள்?

பதில்: எமது நாட்டில் பாலியல் கல்வி வழங்கப்படுகின்றதே தவிர உடல் பாதுப்புக்கான சட்டக் கல்வி வழங்கப்படுவதில்லை. இது எமது நாட்டில் அதனை நடைமுறைப்படுத்துவதில் உள்ள சிக்கலான விடயமாகும். எனவே, விழிப்புணர்வை ஏற்படுத்தும் வகையில் பாலியல் ரீதியான சட்டக் கல்வி வழங்கப்படுவது அவசியமாகும். தனது உடல் தனக்கே சொந்தமானது. பிறரால் தொடுவதற்கு அனுமதிக்கப்படக் கூடாது என்ற அறிவை மாணவர்களின் ஆரம்பக் கல்விப் பருவத்திலேயே நாம் வழங்க வேண்டும். எனவே கல்வி முறைமையை விரிவாக்கம் செய்யும்போது, எமது சிறுவர் சமுதாயத்துக்கு பாலியல் கல்வியையும் பாலியல் தொடர்பான சட்டக்கல்வியையும் வழங்க வேண்டிய கட்டாயத்தில் உள்ளோம்.

கேள்வி: மகளிர் மற்றும் சிறுவர் விவகார அமைச்சர் என்ற ரீதியில் நீங்கள் அமைச்சு பதவியை பொறுப்பேற்றதன் பின்னர், குறிப்பிட்ட காலத்தில் நாட்டில் பதிவான சிறுவர் துஷ்பிரயோக சம்பவங்கள் மற்றும் பெண்களுக்கெதிரான வன்முறைகள் தொடர்பான தரவுகளில் கவனம் செலுத்தினீர்களா?

பதில்: ஆம்… இது தொடர்பாக 1938 என்ற அவசர தொலைபேசி இலக்கமொன்றுள்ளது. இந்த தொலைபேசி இலக்கத்தை மேலும் வலுவாக்க வேண்டிய தேவையுள்ளது. ஏனென்றால் எமது நாட்டிலுள்ள பெண்கள் வன்முறைகளுக்குள்ளாகும்போது, அது தொடர்பான தகல்களை வழங்குவதில் இந்த அவசர தொலைபேசி இலக்கத்தின் செயற்பாடானது மிகவும் மந்தமானதாகவே உள்ளது. அத்துடன், இந்த அவசர இலக்கத்தினூடாக தமிழில் சேவைகளை பெற்றுக்கொள்வதிலும் வன்முறைக்கெதிராக உடனடி சட்ட நடவடிக்கைகளை மேற்கொள்வதிலும் பாரிய சிக்கல்கள் உள்ளன. எனவே, அமைச்சராக நான் பொறுப்பேற்றதன் பின்னர் இந்த அவசர இலக்கத்தை சரிவர செயற்படுத்துவதற்கான நடவடிக்கைகளை மேற்கொண்டுள்ளேன்.

இதேவேளை, அரசாங்கம் என்ற ரீதியில் தற்போது க்ளீன் ஸ்ரீலங்கா என்ற திட்டத்தை முன்வைத்திருக்கின்றோம். இதனூடாக “வன்முறையற்ற சமுதாயம் கட்டாயம்” என்பதை நாம் உறுதிப்படுத்துகின்றோம். பெண்கள், சிறுவர்கள் மீதான வன்முறையற்ற சமுதாயத்தை உருவாக்குவதற்கும், பாலியல் துஷ்பிரயோகங்களிலிருந்தும் சிறுவர் துஷ்பிரயோகங்களிலிருந்தும் நாட்டையும் எமது சமுதாயத்தையும் தூய்மைப்படுத்தி பாதுகாப்பான சூழல் ஒன்றை உருவாக்கவும் வேண்டிய தேவைப்பாடு எமக்குள்ளது. சட்டத்தினூடாக மட்டுமன்றி அறிவியல் ரீதியாகவும் மனிதாபிமான அடிப்படையிலும் இதற்கான வேலைத்திட்டங்களை முன்னெடுத்துள்ளோம்.

மேலும், நாடளாவிய ரீதியில், அந்தந்த இடங்களில் நடைபெறுகின்ற சம்பவங்களுக்கு உடனடி நடவடிக்கை எடுக்க வேண்டியதும் கட்டாயமாகும். அதன்படி, ஒவ்வொரு பிரச்சினைக்கும் தனித்தனியே தீர்வு காண்பதை விட, ஒட்டுமொத்த சமுதாயத்துக்கான வழிப்புணர்வு, சட்டத்தின் பாதுகாப்பு, சமுதாய அங்கீகாரம் மற்றும் பெண்கள் பாதுகாப்பு போன்றவற்றை வழங்கி சமூக சீர்திருத்தத்தை மேற்கொள்ள வேண்டும் என்பதில் நாம் உறுதியாகவுள்ளோம். அவ்வாறின்றி, வன்முறை மற்றும் பாலியல் குற்றச் சம்பவங்களுக்கு தனிப்பட்ட ரீதியில் வழக்குகள் பதிவு செய்வதாலும் தண்டனை பெற்றுக்கொடுப்பதாலும் இதனை முழுமையாக நிறுத்த முடியாது. எனவே கொள்கை ரீதியான மாற்றங்களை கொண்டுவரவேண்டியது கட்டாயமாகும்.

கேள்வி: இவ்வாறான வன்முறைகளுக்கெதிராக எவ்வாறான சட்டங்கள் அமுல்படுத்தப்பட வேண்டும் என நீங்கள் நினைக்கின்றீர்கள்?

பதில்: சட்டங்கள் எதனையும் மாற்றுவதற்கான அதிகாரம் மகளிர் மற்றும் சிறுவர் விவகார அமைச்சுக்கு கிடையாது. எனினும், பாலியல் ரீயாகவும் கல்வி, கலாசார மற்றும் மதம் சார்ந்த விடயங்களிலும் மக்கள் பாதிப்பை எதிர்நோக்குகின்றார்கள் என்றால் அதற்காக குரல் கொடுப்பதற்கும் சமூக விழிப்புணர்வை ஏற்படுத்துவதற்கும் அதற்கான முன்மொழிவுகளை முன்வைப்பதற்கும் முடியும். சட்டங்களில் மாற்றங்களை ஏற்படுத்துவதற்குரிய அதிகாரம் நீதியமைச்சுக்கும் சமூக பாதுகாப்புக்கான அமைச்சுக்குமே உள்ளது.

எனினும், அந்த சட்டங்களில் இருக்கும் குறைபாடுளை சுட்டிக்காட்டி அவற்றை சீர்செய்து மேலும் சட்டங்களை வலுப்படுத்துவதற்கான நடவடிக்கைகளை மேற்கொண்டுள்ளோம். உதாணமாக, தொழிலாளர் சட்டத்தின் கீழ் 14 வயதுக்குட்பட்ட சிறுவர்களை வேலைக்கு அமத்துவது தண்டனைக்குரிய குற்றம். எனினும் வயதை அடிப்படையாகக் கொண்டு, 18 வயது பூர்த்தியாகாத அனைவரும் மாணவர்களாகவும் சிறுவர்களாகவும் பார்க்கப்பட வேண்டும் என வலியுறுத்துகின்றோம். இவர்களை வேலைக்கு அமர்த்துவது சட்டவிரோதமான செயல் என குறிப்பிடுகின்றோம். ஆனால் சட்டத்தின்படி, 14 வயதுக்கு குறைவான சிறுவர்களை வேலைக்கு அமர்த்தியிருந்தால் மாத்திரமே தண்டனை வழங்க முடியும்.

அதன்படி, சர்வதேச ரீதியில் சிறுவர்களுக்கான சட்ட வரைவிலக்கணம் வேறாகவும், தொழிலாளர் சட்ட வரைவிலக்கணம் வேறாகவும் உள்ளது. இதனை சட்டத்திலுள்ள முரண்பாடகவே நாம் அவதானிக்கின்றோம். 18 வயது வரை சிறுவர்கள் கல்வி கற்க வேண்டும் என்பதை சட்டத்தின் ஊடாக உறுதிப்படுத்த வேண்டும். தொழிலாளர் சட்டத்தில் குறிப்பிட்டுள்ளதைப்போன்று, 14 வயதிலிருந்த 18 வயது வரையான சிறுவர்கள் வேலைக்கு அமர்த்தப்பட்டால் அவர்களுக்கான நீதியை பெற்றுக்கொடுப்பதில் சட்டச் சிக்கல்கள் உள்ளன. இதற்கெதிராக ஒருவர் சட்டத்தின் முன் நின்று நீதி கேட்டால் அந்த நீதி நியாயமான முறையில் கிடைக்கப்பெறுமா? என்பதும் சந்தேகமாகவே உள்ளது. எனவே இது தொடர்பான விடயங்களையே திருத்திக்கொள்ள வேண்டும். இது தொடர்பான வரைவிலக்கணத்தை வழங்குமாறு நீதியமைச்சிடமும் நாம் கேட்டுள்ளோம். எனவே, நீதியமைச்சு, சட்டமா அதிபர் திணைக்களம், தொழில் அமைச்சு ஆகியவை இணைந்து பொதுவான முடிவொன்றை எடுக்க வேண்டிய கட்டாயத்தில் உள்ளன. அரசாங்கம் என்ற ரீதியில் அனைவரும் ஒன்றிணைந்தே இவ்வாறான பிரச்சினைகளுக்கு தீர்வு காண வேண்டும். தனிப்பட்ட ரீதியில் நடவடிக்கைகளை மேற்கொள்வது உகந்ததல்ல.

கேள்வி: மலையகத்தில், சிறுவர்களை வேலைக்கமர்த்துவது தொடர்ந்த வண்ணமாகவே உள்ளது. ஜனாதிபதியும் தனது பிரசார மேடைகளில் இது தொடர்பாக தனது கருத்தை வெளிப்படுத்தியிருந்தார். இவ்விடயம் தொடர்பாக அரசாங்கம் மேற்கொண்டுள்ள நடவடிக்கை என்ன?

பதில்: பாடசாலைக் கல்வியை இடைநிறுத்திவிட்டு வெளியில் செல்லும் மாணவ சமுதாயத்தை மீட்டெடுத்து அவர்களுக்கான கல்வியை உரிய முறையில் வழங்குவதற்கான நடவடிக்கைகளை மேற்கொண்டுள்ளோம். மேலும், மாணவர்களுக்கான 6,000 ரூபா வழங்குதல், அனைவருக்குமான இலவச சீருடை, இலவச பாதணி, பாடசாலை புத்தகங்கள் மற்றும் குறைந்த வருமானம் கொண்ட பிரதேசங்களில் வாழும் மாணவர்களுக்கான காலை நேர உணவு வழங்குதல் போன்றவற்றை எமது புதிய அரசாங்கம் உள்வாங்கியுள்ளது. இதன்மூலம் மாணவர்கள் தமது பாடசாலைக் கல்வியை இடைநிறுத்துவதை தவிர்ப்பதே இதற்கான முக்கிய காரணமாகும்.

எது எவ்வாறாக இருந்தாலும், மாணவர்களும் கல்வியில் ஆர்வமுள்ளவர்களாக மாற வேண்டும்.

அதன்படி, மாணவர்கள் விருப்பத்துடன் கல்வி கற்கக்கூடிய முறைமையொன்று உருவாக்கப்பட வேண்டும். தொழில்நுட்பத்தில் பின்தங்கியுள்ள கல்வி முறைமை, ஆங்கில, விஞ்ஞான மற்றும் கணித பாடத்துக்கு ஆசிரியர்கள் இல்லாத மலையக பாடசாலைகளின் வசதியின்மை, ஆசிரியர் பற்றாக்குறை மற்றும் சுகாதார பிரச்சினைகள் போன்றவை மாணவர் சமுதாயத்தை வெளியில் தள்ளுவதற்கான காரணங்களாக அமைந்துள்ளன.

ஆகவேதான், இந்திய அரசாங்கத்துடன் இணைந்து மலையக பாடசாலைகளுக்கு 1000 ஸ்மார்ட் வகுப்பறைகளை வழங்குவதற்கான ஒப்பந்தத்தில் கைச்சாத்திட்டுள்ளோம்.

மேலும், பாதுகாப்பான வீட்டுச் சூழல் என்பதும் மிகவும் முக்கியமாகும். 200 வருடங்களுக்கும் மேலாக லயன் குடியிருப்புக்களில் வாழும் மலையக மக்களுக்கான வீடுகளை வழங்குவதற்கான திட்டங்களை ஆரம்பித்துள்ளோம். அதன்படி இவ்வருடத்திற்குள் 5000 வீடுகளை கட்டிக்கொடுப்பதற்கான ஒதுக்கீடுகளை செய்துள்ளோம்.

அடுத்த 2026ஆம் ஆண்டில் இன்னும் 5000 வீடுகள் கட்டிக் கொடுக்கப்படும். அதன்படி 2 வருடங்களுக்குள் 10,000 வீடுகளை கட்டிக்கொடுப்பதற்கான திட்டம் எமது அரசாங்கத்திடம் உள்ளது.

மாணவர்களின் வாழ்க்ைக நிலையென்பது, அவர்கள் வாழும் சூழல், சமுதாயம், பெற்றோரின் வாழ்நிலை, வருமானம் போன்ற அனைத்துமே உயர்த்தப்படவேண்டும். அதற்கு தேவையான நடவடிக்கைகளை நாம் இந்த நாட்களில் மேற்கொண்டுள்ளோம்.

கேள்வி: தமது பிள்ளைகள் குறிப்பிட்ட வயதை அடையும் வரை தாய்மார் வெளிநாட்டுக்கு செல்லக்கூடாது, என சட்டமே உள்ள போதிலும், ஒரு சிலர் தமது வறுமையின் நிமித்தம் போலி முகவர்கள் மூலம் போலி ஆவணங்களை தயார் செய்து வெளிநாட்டுக்கு செல்வது தொடர் கதையாகவே உள்ளது. இதனால் அவர்களின் பிள்ளைகள் பாலியல் ரீதியான துஷ்பிரயோகங்கள் உட்பட பல இன்னல்களுக்கு முகங்கொடுத்து வருகின்றனர். இது தொடர்பாக உங்கள் அமைச்சு மேற்கொண்டுள்ள நடவடிக்கைகள் தொடர்பாக தெரிந்துகொள்ள முடியுமா?

பதில்: இதில் இரு பக்கங்கள் உள்ளன. அதில் முதலாவதாக ஐந்து வயதை பூர்த்தி செய்யாத குழந்தைகளின் தாய்மாரை வெளிநாட்டு வேலைகளுக்கு அனுப்பக் கூடாது என்பதிலும் அதற்கெதிராக சட்ட நடவடிக்கைகள் எடுக்கப்படவேண்டும் என்பதிலும் அரசாங்கம் என்ற ரீதியில் நாம் உறுதியாகவுள்ளோம்.

இதனால் தேசிய வருமானம் வீழச்சியடைவதுடன் அந்தந்த குடும்பங்களின் வருமானமும் சீர்குலைகின்றது.

அடுத்ததாக, பெண்களின் உழைப்பு, அறிவு, திறமை போன்றவற்றை வெளிப்படுத்த சிறுவர்களை காரணம் காட்டி தடைசெய்ய வேண்டாம் என பெண்கள் சார்ந்த சில அமைப்புக்கள் எம்முடன் வாதிடுகின்றன. இந்நிலையில், முழுமையான கல்வியை பெற்றவர்களும் முறைசார்ந்த தொழிலில் ஈடுபடுகின்றவர்களும் பயிற்றுவிக்கப்பட்ட ஊழியர்களும் இவ்வாறு வெளிநாடுகளுக்கு போவதில்லை. மாறாக, கல்வியறிவில் பின்தள்ளப்பட்ட, பாதிக்கப்பட்ட குடும்பங்களைச் சேர்ந்த, வறுமைக்கோட்டின் கீழ் வாழ்கின்ற பெண்களே அதிகளவில் வேலை வாய்ப்புகளுக்காக வெளிநாடுகளுக்குச் செல்கின்றனர்.

எனவே, இந்த வறுமையை இல்லாதொழிக்கவே நடவடிக்கைகளை மேற்கொள்ள வேண்டும். 5 வயதுக்குட்ட பிள்ளைகளின் தாய்மாரை வெளிநாடுகளுக்கு அனுப்பக்கூடாது என்ற விடயத்தில் அரசாங்கம் உறுதியாகவுள்ளது. எனினும், எமது நாட்டில் குழந்தைககைள பராமரிக்கக்கூடிய பாதுகாப்பான நிலையங்கள் இருந்தால் மாத்திரமே தாய்மார் உள்நாட்டிலும் கூட தொழிலுக்குச் செல்ல முடியும். தோட்ட வேலைகளுக்குச் செல்வதாக இருந்தாலும் கூட பிள்ளைகளை விட்டுவிட்டுச் செல்வதற்கு பாதுகாப்பான இடங்கள் இல்லை. கூலித் தொழிலாளர்களோ, வங்கி உத்தியோகத்தர்களோ, ஆசிரியர்களோ அல்லது அரசியல்வாதிகளோ எந்த தொழிலில் இருந்தாலும் அப் பெண்களுக்கு தமது பிள்ளைகளை பாதுகாப்பான இடங்களில் விட்டுச்செல்வதற்கு இடமில்லை. எங்களது கணிப்பீட்டின்படி, அதிகளவிலான பெண்கள் தமது கல்வி, தொழில் அனைத்தையும் இழந்து வீட்டு பணிப்பெண்களாக தமது பிள்ளைகளை பராமரித்துக்கொண்டிருக்கின்றனர். அதனால் அப் பெண்களுக்கு குழந்தை பராமரிப்பு நிலையங்களை உருவாக்கிக் கொடுக்க வேண்டிய கட்டாயம் எமக்குண்டு.

கேள்வி: பெண்களிடையே எவ்வாறான மாற்றங்களை நீங்கள் எதிர்பார்க்கின்றீர்கள்? பெண்களை அதிகாரமுள்ளவர்களாக மாற்றுவதற்கு JVP அரசாங்கத்திடம் ஏதேனும் திட்டங்கள் உள்ளனவா?

பதில்: கடந்த 9 ஆவது பாராளுமன்றத்தில் 12 பெண் பிரதிநிதிகளே இருந்தனர். ஆனால், தற்போதைய அரசாங்கத்தில் 22 பெண் பாராளுமன்ற பிரதிநிதிகள் உள்ளனர். அதன்படி, அரசியல் அதிகாரத்தில் பெண்களுக்கு அதிக பங்களிப்பை எமது அரசாங்கம் வழங்கியுள்ளது.

அத்துடன், மாகாணசபை மற்றும் உள்ளூராட்சிமன்ற தேர்தல்களிலும் பெண்களுக்கு கூடுதலான பங்களிப்பை வழங்க முயற்சி செய்து வருகின்றோம். அதேபோன்று எமது அரசாங்கத்தில் அமைச்சுக்களில் முக்கிய தீர்மானங்களை எடுக்கக்கூடிய இடங்களில் அதிகளவில் பெண்களே உள்ளனர். ஆகையால் ஏனைய அரசாங்கங்களை விட, பெண் விடுதலை, பெண் சுதந்திரம், பெண் அபிவிருத்தி போன்ற விடயங்களில் நாம் முன்னிலையிலுள்ளோம். குறிப்பாக அரசியலில் அங்கம் வகிப்பதற்கு நாம் அதிகளவில் பெண்களுக்கு முக்கியத்துவம் வழங்கியுள்ளோம்.

கேள்வி: மலையகத்தை பிரதிநிதித்துவப்படுத்தி பாராளுமன்ற உறுப்பினராக இருக்கும் நீங்கள், இதுவரை காலத்தில், அம் மக்கள் தொடர்பாக ஏதேனும் ஒரு விடயத்தை அரசாங்கத்தின் கவனத்துக்கு கொண்டு சென்றுள்ளீர்களா?

பதில்: நான் நாட்டிலுள்ள அனைத்து பெண்களையும் பிரதிநிதித்துவப்படுத்தியே இந்த அரசியலில் செயற்பட்டு வருகின்றேன் என்பதை வலியுறுத்திக்கூற விரும்புகின்றேன். அதில் தமிழ், சிங்களம், முஸ்லிம் என்ற எந்த பாரபட்சமும் கிடையாது. நாட்டிலுள்ள ஒட்டுமொத்த பெண் சமுதாயத்தையும் பிரதிநிதித்துவப்படுத்தி அனைத்து மக்களுக்காகவுமே மகளிர், சிறுவர் விவகார அமைச்சராக செயற்பட்டு வருகின்றேன்.

இதேவேளை, நாட்டில் அந்நிய செலாவணியை ஈட்டித்தரக்கூடிய சமுதாயமாகவுள்ள மலையக தோட்டத் தொழிலாளர்களுக்கான காணி உரிமை, வீட்டுரிமை, அவர்களின் பேச்சுரிமை, சுதந்திரம், ஆரோக்கியமான வாழ்வு, போசாக்கான உணவு மற்றும் அவர்களின் பிள்ளைகளுக்கான கல்வி போன்ற அனைத்தையும் உறுதிப்படுத்துகின்ற அரசாங்கமாக நாம் செயற்பட்டு கொண்டிருக்கின்றோம்.

அதேபோன்று வடக்கு, கிழக்கில் யுத்தத்தால் பாதிக்கப்பட்ட தனித் தலைமைத்துவக் குடும்பங்கள், நுண்கடன் வசதிகளை பெற்று பாதிப்புக்குள்ளான பெண்கள், முக்கியமாக தனி தலைமைத்துவ பெண் குடும்பங்களுக்கான தேவைகளை நிறைவேற்றுவதில் எமது புதிய அரசாங்கம் செயற்பட்டுக்கொண்டிருக்கின்றது.

கேள்வி: இறுதியாக நீங்கள் கூற விரும்புவது என்ன?

பதில்: இது ஒரு மறுமலர்ச்சி யுகம். இந்த மறுமலர்ச்சி யுகத்துக்குள் சிறுவர்கள், பெண்கள் சுதந்திரமாக, பாதுகாப்பாக, உரிமைகளை பெற்று வாழ்கின்ற ஆரோக்கியமான சமுதாயத்தை உருவாக்குவதற்காக முழு முயற்சியுடனும் அர்ப்பணிப்புடனும் செயற்படக்கூடிய அமைச்சராக இருப்பேன் என கூறிக்கொள்ள விரும்புகின்றேன்.