இலண்டன் தமிழவையின் வெள்ளிவிழா எதிர்வரும் 05.10.2024 அன்று இலண்டனில் Woodford Green Essex IG8 7 DQ என்ற இடத்தில் உள்ள Woodbridge High School அரங்கில் முழுநாள் நிகழ்வாக நடைபெற இருக்கின்றது.
கடந்த 25 வருடங்களாக தமிழுக்கும், தமிழ் இலக்கியத்துக்கும், தமிழர் விழுமியங்களுக்கும் பெரும் தொண்டாற்றிவருகின்ற இந்த தமிழவையை நிறுவி பல நிகழ்வுகளை செய்து வருபவர் தமிழவையின் நிறுவனர் புலவர் ந.சிவன்தான் இவர் வேறு யாருமல்ல இலங்கையின் தேசிய கீதத்தை தமிழில் மொழிபெயர்த்த முத்தமிழ் புலவர் நல்லதம்பியின் புதல்வர் ஆவார். பொறியியலாளரான இவர், தனது தந்தையரைப் போல் ஒரு சிறந்த கவிஞராகவும் தமிழறிஞராகவும், நாட்டிய நாடகங்களை எழுதி அவற்றை நெறிப்படுத்தி அரங்கேற்றுபவராகவும், தொல்லியல் ஆய்வாளராகவும், பல நூல்களை எழுதிய எழுத்தாளராகவும் இருக்கின்றார்.
இவர் நிறுவி வெள்ளிவிழா காணவிருக்கும் தமிழவை மிக சிறப்பாக இயங்கி வருகின்றது. இவரோடு தமிழவையில் பல தமிழறிஞர்களும், புத்திஜீவிகளும் இருக்கின்றார்கள். இவர்கள் எல்லோரும் சேர்ந்தே தமிழ் கலாசாரத்தையும், தமிழ்மொழியின் வரலாற்றுச் சிறப்பையும் அதன் இலக்கிய மற்றும் புராண, இதிகாசங்கள் பற்றிய சிறப்புகளையும் எதிர்கால இளம் சந்ததியினர் அறிந்துகொள்ள வேண்டும் என்ற நல்ல நோக்குடன் இயல், இசை, நாடகம் ஆகிய முத்தமிழ்மூலம் பல படைப்புகளை தயாரித்து அவர்களுக்கு மேடை நிகழ்சிகள் மூலம் அரங்கேற்றுகின்றார்கள். பல இளஞர்கள், யுவதிகள் ஆர்வம்கொண்டு இந்த நிகழ்வுகளில் பங்கேற்கிறார்கள்.
கோவிலூர் செல்வராஜன் இலண்டன்
