Home » இறையே செவிசாய்ப்பாய்

இறையே செவிசாய்ப்பாய்

by Damith Pushpika
May 12, 2024 6:37 am 0 comment

நெருப்பெடுத்த வெயில்
உடைப்பெடுத்த வியர்வை
துடைக்கத்துடைக்க வழியும்
துகிலனைத்தும் நனையும்

காய்த்திடும் கத்திரிவெயில்
முறித்திடும் முந்திரிவெக்கை
கரிக்கும் கானல் நீரோடும்
கனலோடு நம் வாழ்வாடும்

தருக்களை அழித்து
தெருக்களும் கடைகளும்
தீய்க்கும் வெப்பத்தில்
தடுமாறும் பேருலகம்

நெகிழியைக் கொடுத்து
நதிகளை அழித்தாய்
நிர்க்கதியாகி நாளும்
நஞ்சினை உள்ளிழுத்தாய்

தடுப்பில்லா தாகம்
தரையா தழலாவென சந்தேகம்
தாங்கொணா எரிப்பில்
தேகங்கள் அனலாகும்

தர்ப்பூசணியும் மோரும்
தேசிக்காய், பழவகைச்சாறும்
தேடித்தேடி நீர்விடாயைத்
தோற்கடிக்கவோடும் மனிதவாறு

உடலிலே அரிப்பு
உருவாகும் கொதிப்பு
அதியுயர் வெப்பத்தில்
உடல்நீர்மம் இழப்பு

அம்மையின் அட்டகாசம்
வெம்மையின் வீரத்தாண்டவம்
கோடையின் கடுங்கொப்புளம்
கொளுத்தும் வெயில் கொடூரம்

நெரிசலில் நசுங்கி
நரகத்தின் சூடுணர்ந்து
புழுக்கத்தில் புலம்பி
பரிதவிக்கும் காலம்

தீப்பிடித்த காற்றோ?
திகைக்கவைக்கும் கதிர்க்கீற்றோ?
கனன்று உயிர்பிதுக்கும்
காலனின் மூச்சோ?

பெருகும் மானிடர்க்கு
உயரும் கொன்கிறீட்காடு
உருகும் பனிப்பாறை
அருகும் வனவழகு

சுனையாறு குளம் யாவும்
சடுதியில் வற்ற
வினையின் பயன்
வீரியமாய்க் கிடைத்ததோ?

தண்மையை நாடியே
தரணியில் உயிர்களும்
தாராளமாய் அருந்திடவின்றி
துவண்டிடும் பயிர்களும்

கடைகண்ணி செல்லல்
கலியுக யுத்தமாய்
மடைதிறந்த வேர்வையில்
மயக்கமுறும் மனிதம்

வெதும்பும் உள்ளம்
வேகாத வெயிலில்
வேண்டிப் பிரார்த்திக்கும்
வரமாகும் மழையை

நிழலைத் தேடி
நீண்ட காத்திருப்பு
அவலம் துடைக்க
இறையே செவிசாய்ப்பாய்

Dr ஜலீலா முஸம்மில், ஏறாவூர், இலங்கை

You may also like

Leave a Comment

lakehouse-logo

இலங்கை மக்களால் அதிகம் விரும்பப்படும் தேசிய தமிழ் நாளிதழ்

[email protected]
Call Us : (+94) 112 429 429

Web Advertising :
Nuwan   +94 77 727 1960
 
Classifieds & Matrimonial
Chamara  +94 77 727 0067

Facebook Page

All Right Reserved. Designed and Developed by Lakehouse IT Division