Home » எங்கேயென்று தேடுகிறேன்

எங்கேயென்று தேடுகிறேன்

by Damith Pushpika
January 21, 2024 7:00 am 0 comment

அறிவார்ந்த அவையோரினால்
அழகோங்கிடும் மன்றத்தில்
வரமாகிய கல்வியில்
வாகைசூடி நானொளிரக்
கரமாடும் காற்றலையில்
கலையாது ஒலியேற்ற
உரமூட்டிய என்னாசான்கள்
எங்கேயென்று தேடுகிறேன்

முற்றாத இளமனமும்
வற்றாத புன்னகையுமாய்
சிட்டான பருவத்தில்
கற்றொழுக சென்றயெனைக்
கனிவோடு வரவேற்று
அடியாது ஏசாது
அகரமூட்டிய என்முதலாசன்
எங்கேயென்று தேடுகிறேன்

வெள்ளைத் துகள்கள்
விசிறியடித்த
எந்தன்
பள்ளியறைக் கட்டடத்தில்
பாகுபாடு காட்டாது
தெள்ளமுதக் கல்வியை
தெளிவாக ஊட்டிய
கள்ளமில்லா என்னாசான்
எங்கேயென்று தேடுகிறேன்

அறிவின் பேருற்றாய்
அன்னையின் மறுவுருவாய்
நெறியூட்டும் அறப்பணியை
நேர்த்தியான முதற்பணியாய்க்
கரமேற்றுச் செயலோச்சித்
துறைகாட்டி மாணாக்கரைக்
கரையேற்றிய என்னாசான்கள்
எங்கேயென்று தேடுகிறேன்

மாய்கின்ற இன்பத்தில்
மகிழ்கின்ற இளவயதில்
சாய்கின்ற இளமனம்
சரியாது எமைக்காத்துச்
சேயாக எமைப்பார்த்துக்
கனியமுதக் கல்வியூட்டிய
கண்ணியமான என்னாசான்கள்
எங்கேயென்று தேடுகிறேன்

பேராளும் துறைகளைப்
பேருலகிற்கு வழங்கிடும்
சீராளும் சிறப்பாலும்
சிந்தையுறும் பண்பாலும்
பாராளும் பணிகளில்
பவளமுத்தாய் விளங்கிடும்
மகத்துவ மிக்க என்னாசான்கள்
எங்கேயென்று தேடுகிறேன்

ஏரூர் றமீஸ் ஏறாவூர்

You may also like

Leave a Comment

lakehouse-logo

இலங்கை மக்களால் அதிகம் விரும்பப்படும் தேசிய தமிழ் நாளிதழ்

[email protected]
Call Us : (+94) 112 429 429

Web Advertising :
Nuwan   +94 77 727 1960
 
Classifieds & Matrimonial
Chamara  +94 77 727 0067

Facebook Page

All Right Reserved. Designed and Developed by Lakehouse IT Division