மக்கள் இன்று தேர்தலை நடத்துமாறு கோரவில்லை!

நாளாந்தம் எதிர்நோக்கும்பிரச்சினைகளுக்குத்தீர்வுகள் வழங்கப்பட வேண்டும் என்றே மக்கள் எதிர்பார்க்கின்றனர். இவ்வாறானதொரு நேரத்தில் மக்கள் தேர்தலொன்றைக் கோரவில்லையென விவசாயத்துறை அமைச்சர் மஹிந்த அமரவீர தெரிவித்தார். நாட்டின் தற்போதைய நிலைமைகள் மற்றும் அரசாங்கத்தின் நடவடிக்கைகள்குறித்து எமது நிறுவனத்துக்கு வழங்கிய நேர்காணலில் அவர் இவ்வாறு தெரிவித்தார்.

கே: கடந்த இரண்டு வாரங்களாக அனைத்துக் கட்சி ஆட்சியை அமைப்பது தொடர்பான கலுந்துரையாடல்கள் இடம்பெற்று வருகின்றன. எனினும், இதுவரை இணக்கப்பாடொன்று எட்டப்படவில்லை. இதற்கான காரணம் என்ன?

பதில்: உண்மையில், இது ஒரு குறிப்பிட்ட நபருக்கு மட்டுமே காணப்படும் பிரச்சினை அல்ல. ஜனாதிபதி ரணில் விக்கிரமசிங்க ஏற்கனவே அனைத்து அரசியல் கட்சிகளுக்கும் சர்வகட்சி அரசாங்கம் அமைப்பதற்கு கைகோர்க்குமாறு அழைப்பு விடுத்துள்ளார்.. இந்த விடயம் தொடர்பில் அரசியல் கட்சிகளுடன் ஜனாதிபதி நேரம் ஒதுக்கி ஏற்கனவே கலந்துரையாடியுள்ளார். சில அரசியல் கட்சிகளுடன் பல சுற்றுப் பேச்சுவார்த்தைகள் நடத்தப்பட்டுள்ளன. சர்வகட்சி அரசாங்கத்தை அமைப்பதற்கு ஜனாதிபதி தனது விருப்பத்தைத் தெரிவித்திருக்கும்போது, மற்ற அரசியல் கட்சிகளும் இந்த முயற்சியை வெற்றியடையச் செய்ய சாதகமாகப் பதிலளிக்க வேண்டும். ஒரு கட்சி அல்லது ஒரு குழு சர்வகட்சி அரசாங்கத்தை உருவாக்கும் நிலையில் இல்லை. இதற்கு ஜனாதிபதி பச்சைக் கொடி காட்டியுள்ளார். எனவே, மற்றக் கட்சிகளும் கைகோர்த்து சர்வகட்சி அரசாங்கத்தை அமைப்பது நாட்டுக்குப் பயனுள்ளதாக அமையும்.

கே: இது விடயத்தில் சுதந்திரக் கட்சியின் நிலைப்பாடு என்ன? அவ்வாறான அரசாங்கத்துக்கு ஆதரவு வழங்க கட்சி முடிவு செய்துள்ளதா?

பதில்: முன்னாள் ஜனாதிபதி கோட்டாபய ராஜபக்ஷவின் ஆட்சிக் காலத்தில் ஸ்ரீலங்கா சுதந்திரக் கட்சியே சர்வகட்சித் திட்டத்தை முன்வைத்தது. இதில் நாம் ஆர்வமாக இருந்ததுடன், முக்கிய பங்கினையும் வகித்தோம். சர்வகட்சி அரசாங்கத்தை அமைப்பது குறித்து முடிவெடுப்பதற்காக நடந்து வரும் பேச்சுக்களுக்கு ஸ்ரீலங்கா சுதந்திரக் கட்சியின் நேரடித் தலையீடு இத்தருணத்தில் மிகவும் அவசியமானது. இது தொடர்பில் நான் மட்டுமன்றி ஸ்ரீலங்கா சுதந்திரக் கட்சியின் ஏனைய பாராளுமன்ற உறுப்பினர்களும் கட்சி அரசியல்பீடம் மற்றும் பல்வேறு மட்டங்களில் தமது கருத்துகளை வெளியிட்டு வருகின்றனர். உண்மையில் சர்கட்சி அரசாங்கம் அமைப்பதில் சுதந்திரக் கட்சியே முன்னிலை வகிக்க வேண்டும்.

கே: ஜனாதிபதி ரணில் விக்கிரமசிங்கவுக்கும் ஐக்கிய மக்கள் சக்தியின் பிரதிநிதிகளுக்கும் இடையில் நடைபெற்ற அண்மைய சந்திப்பைத் தொடர்ந்து அரசாங்கத்துடன் இணைவதற்கான கோரிக்கையை எதிர்க்கட்சித் தலைவர் சஜித் பிரேமதாச மீண்டும் நிராகரித்துள்ளார். இது பற்றி உங்கள் நிலைப்பாடு என்ன?

பதில்: இது மிகவும் துரதிர்ஷ்டவசமான நிலை. அரசாங்கத்திற்கு வெளியே இருப்பவர்கள் அனைவரும் அரசாங்கத்தின் சிறந்த நடவடிக்கைகளுக்குத் தமது ஆதரவை வழங்குவதாகக் கூறுகின்றனர். பொருட்களின் விலைகளைக் குறைத்தல், மக்களுக்கு நிவாரணம் வழங்குதல் மற்றும் அரச ஊழியர்களின் சம்பளத்தை அதிகரிப்பது போன்றன நல்ல நடவடிக்கைகள் என்று அவர்கள் நினைக்கலாம். அப்போது அவர்கள் இத்தகைய நகர்வுகளுக்கு தங்கள் ஆதரவை வழங்குவார்கள்.

இது மிகவும் வெளிப்படையானது, எதிர்க்கட்சிகளும் மற்ற அனைத்துக் கட்சிகளும் இத்தகைய மக்களின் முயற்சிகளுக்கு எப்போதும் தங்கள் ஆதரவை வழங்குகின்றன. இல்லையெனில், அத்தகைய நடவடிக்கைகளுக்கு ஆதரவளிக்காமல் அவர்கள் தங்கள் கிராமங்களுக்குத் திரும்ப முடியாது.

அரசாங்கத்துடன் இணைந்து தங்கள் முன்மொழிவுகளைச் சமர்ப்பிக்க வேண்டும். அதைச் செய்ய முதலில் அவர்கள் அரசாங்கத்தின் பங்குதாரராக மாற வேண்டும். புதிய அரசாங்கத்தின் அமைச்சரவை அமைப்பது குறித்து இந்த நாட்களில் கலந்துரையாடல்கள் இடம்பெற்று வருகின்றன. அமைச்சரவை மற்றும் அதன் உறுப்பினர்களின் இலாகாக்களின் எண்ணிக்கையை முடிவு செய்ய பிரதான எதிர்க்கட்சியான ஐக்கிய மக்கள் சக்தி இந்த விவாதங்களில் பங்கேற்க வேண்டும். அப்பணியில் ஈடுபட தங்கள் பிரதிநிதிகளையும் நியமிக்க வேண்டும். அப்போதிருந்து, நாம் முன்னேறலாம். தனியார்மயமாக்கல் விவகாரம் மற்றும் அது எவ்வாறு நடைபெற வேண்டும் என்பது குறித்து எதிர்க்கட்சிகளும் கைகோர்த்து விவாதிக்க வேண்டும். அரசாங்கத்தின் பங்குதாரராக மாறாமல் சர்வகட்சி அரசாங்கத்துக்கு அல்லது அத்தகைய திட்டத்திற்கு வெளியில் இருந்து அவர்களின் ஆதரவை வழங்குவது வெற்றிகரமானதாகவோ அல்லது நடைமுறைக்குரியதாகவோ இருக்கும் என்று நான் நினைக்கவில்லை.

கே: எதிர்க்கட்சிகளின் தற்போதைய நடத்தை குறித்து உங்கள் பகுப்பாய்வு என்ன? அரசியல் வேறுபாடுகளைப் பொருட்படுத்தாமல் நெருக்கடியான சூழ்நிலையிலிருந்து நாட்டை மீட்டெடுக்க அவர்கள் தங்கள் ஆதரவை வழங்க வேண்டும் என்று நீங்கள் நினைக்கவில்லையா?

பதில்: கண்டிப்பாக. இத்தருணத்தில் பாராளுமன்றத்தில் உள்ள 225பாராளுமன்ற உறுப்பினர்களும் அரசாங்கத்தின் பங்குதாரர்களாக மாற வேண்டும். நாடு கடுமையான பொருளாதார நெருக்கடிகளை எதிர்கொண்டு, மக்கள் கடும் இன்னல்களை எதிர்கொண்டுள்ள நிலையில், எதிர்க்கட்சிகள் வேண்டுமென்றே புறக்கணித்து முழுப்பொறுப்பையும் ஒரு குறிப்பிட்ட குழு அல்லது நபர் மீது சுமத்த முற்படுவது, நாடு எதிர்கொண்டுள்ள துரதிஷ்டமான நிலையையே காட்டுகிறது.

கே: அரசாங்கத்தில் அங்கம் வகிக்கும் கட்சிகளின் குழு ஒன்று புதிய அரசியல் கூட்டணியை செப்டம்பர் 4ஆம் திகதி அமைக்கவுள்ளது. இது அரசுக்கு ஏதேனும் பாதகமான விளைவுகளை ஏற்படுத்துமா?

பதில்: அதைப் பற்றி எனக்குக் கூறத் தெரியவில்லை. உண்மையில், இது புதிய அரசியல் கட்சிகளை உருவாக்கவோ, கூட்டணி அமைக்கவோ, ஏற்கனவே உள்ள கட்சிகளை வலுப்படுத்துவதற்கான நேரமே இல்லை. இத்தருணத்தில் மக்களை பலப்படுத்த நடவடிக்கை எடுக்க வேண்டும். மக்கள் பெரும் இன்னல்களுக்கு ஆளாகும்போது, புதிய அரசியல் கட்சிகளையோ, கூட்டணிகளையோ உருவாக்குவதற்கு இதுபோன்ற சூழலைப் பயன்படுத்திக் கொள்ளக் கூடாது. மக்களின் பிரச்சினைகளுக்கு விரைவான தீர்வுகளை வழங்குவதற்கு மக்கள் சார்பாக நேர்மையாகப் பணியாற்றுவதும், பயனுள்ள பங்களிப்பைச் செய்வதும் காலத்தின் தேவையாகும்.

கே: இலங்கை சட்டத்தரணிகள் சங்கம் பயங்கரவாதத் தடைச் சட்டத்தைப் பயன்படுத்துவது குறித்து கவலைகளை எழுப்பியுள்ளதுடன், அரசாங்கத்திற்கு எதிரான போராட்டங்களில் ஈடுபடும் நபர்களை கைது செய்து தடுத்து வைக்க அதன் ஏற்பாடுகள் பயன்படுத்தப்படுவதாக குற்றஞ்சாட்டியுள்ளது. நீங்கள் கருத்துத் தெரிவிக்க விரும்புகிறீர்களா?

பதில்: பயங்கரவாத தடைச்சட்டத்தை அமுல்படுத்துவதால் மக்களின் போராட்டம் நடத்தும் உரிமை பறிக்கப்படும் என நான் நினைக்கவில்லை. பயங்கரவாதத் தடைச் சட்டம் என்பது அரசாங்கத்திற்கு எதிரான திட்டங்கள், பயங்கரவாத செயல்கள் மற்றும் பொதுச் சொத்துக்களுக்கு ஏற்படும் சேதங்களை கையாள்வதற்கு பயன்படுத்தப்படுகிறது. பயங்கரவாத தடைச் சட்டத்தின் விதிகளைப் பயன்படுத்தி பொதுமக்களின் போராட்டங்களை ஒடுக்குவது ஏற்புடையதல்ல. நான் அறிந்த வரையில் நாட்டில் அவ்வாறானதொரு நிலைமை ஏற்படவில்லை.

கே: தற்போது இலங்கை பொருளாதார நெருக்கடியை எதிர்கொண்டுள்ளது. மேலும் பணவீக்கம் அதிகமாக உள்ள நாடுகளில் ஐந்தாவது இடத்தில் உள்ளோம். நிலைமையைத் தீர்க்க என்ன திருத்த நடவடிக்கைகள் எடுக்கப்பட்டுள்ளன?

பதில்: உணவுப் பணவீக்கத்தில் ஐந்தாவது இடத்தில் இருக்கிறோம். நாடு இவ்வாறானதொரு நெருக்கடியான சூழலை எதிர்கொள்ளும் போது அதற்குத் தீர்வு காண அனைத்துத் தரப்பினரும் கைகோர்த்து ஆதரவு வழங்க வேண்டும். இது அதிகாரத்தைப் பிடிப்பதற்கோ அல்லது ஒருவரையொருவர் குறைகளைக் கண்டுபிடிப்பதற்கோ தலைவர்களாக மாறுவதற்கான நேரம் அல்ல. தற்போதைய நெருக்கடி நிலையிலிருந்து நாட்டை மீட்பதற்கான வேலைத்திட்டத்தை வகுக்க அனைவரும் ஒன்று திரள வேண்டும். அதுவே அனைத்து அரசியல்வாதிகளின் பொறுப்பு.

கே: நாட்டில் தற்போது நிலவும் அரசியல் ஸ்திரமின்மையை அகற்ற 21ஆவது திருத்தம் உதவும் என நீங்கள் நினைக்கிறீர்களா?

பதில்: தற்போது நாட்டில் அரசியல் ஸ்திரமின்மை தொடர்பில் பாரிய பிரச்சினை எதுவும் இல்லை. தற்போதைய அரசாங்கத்திற்குப் பாராளுமன்றத்தில் 113உறுப்பினர்கள் இல்லை என்றால், அங்கு அரசியல் ஸ்திரமின்மைதான் நிலவுகிறது. இன்னும் அரசாங்கம் பாராளுமன்றத்தில் பெரும்பான்மையைக் கொண்டுள்ளது. எவ்வாறாயினும், மக்கள் சிரமங்களை எதிர்கொண்டுள்ளனர் என்பதை நாம் ஒப்புக் கொள்ள வேண்டும். மேலும் பாராளுமன்றத்திற்கு வெளியே மக்கள் போராட்டம் நடத்தப்படுகிறது. அதைத்தான் நாம் உடனடியாக நிவர்த்தி செய்து சரி செய்ய வேண்டும். மக்களுக்கு அத்தியாவசியப் பொருட்களை வழங்குவதும், அவர்களின் எரியும் பிரச்சினைகளுக்குத் தீர்வு காண்பதும் அரசின் பொறுப்பு என்று நான் நினைக்கிறேன். விவசாயத்துறை அமைச்சர் என்ற முறையில் விவசாயிகள் எதிர்கொள்ளும் பிரச்சினைகளுக்குத் தீர்வு காண என்னால் முடிந்த அளவு முயற்சி செய்து வருகிறேன்.

விவசாயிகளுக்கு உரம் வழங்குவதே விவசாயத் துறையில் பெரும் பிரச்சினையாக இருந்தது. அதேபோன்று நெல் சாகுபடியை மேற்கொள்ள விவசாயிகளுக்கு எரிபொருளை வழங்க வேண்டும். இந்த இரண்டு தேவைகளும் பூர்த்தி செய்யப்படும். யால பருவத்திற்குத் தேவையான உரங்கள் வழங்கப்பட்டுள்ள அதேவேளை, மகாபருவத்திற்கான உரத் தேவையும் நிவர்த்தி செய்யப்படும். அப்போது விவசாயிகள் சந்திக்கும் பிரச்சினைகளை ஓரளவுக்கு தீர்த்து வைக்க முடியும்.

கே: ஜே.வி.பி, தமிழ்த் தேசியக் கூட்டமைப்பு மற்றும் வேறு சில பிரிவினர் பொதுத் தேர்தலுக்குச் செல்வதற்குப் பதிலாக தற்போதைய அரசியல் நெருக்கடிக்குத் தீர்வு காண வழியில்லை என்று கருதுகின்றனர். உங்கள் பார்வையை விரிவுபடுத்த விரும்புகிறீர்களா?

பதில்: உண்மையில், நாங்கள் தேர்தலுக்குச் செல்லும் போது இந்தப் பிரச்சினை எப்படித் தீர்க்கப்படும் என்பது அவர்களுக்குத் தெரியாது. அவர்களின் ஒரே நோக்கம் எப்படி அதிகாரத்தை உறுதிப்படுத்துவது என்பதுதான். நாட்டை மேலும் சீர்குலைக்க முயற்சிக்கின்றனர். இந்தக் கட்சிகள் எதுவுமே ஒரு தேர்தலில் குறைந்தபட்சம் 100உறுப்பினர்களையாவது பெற்றுக் கொள்ளும் நிலையில் இல்லை. எனவே, தேர்தலுக்குப் பின்னர் பாராளுமன்றத்தில் தனிப்பெரும்பான்மையைக் கூட பெற முடியாத ஸ்திரமற்ற அரசாங்கம் உருவாகி, அது நாட்டில் மேலும் நெருக்கடிகளை ஏற்படுத்தும்.

இத்தருணத்தில் மக்கள் தேர்தலை கோருகிறார்களா? இல்லை, தற்போது நிலவும் சூழ்நிலையால் மக்கள் கடும் சிரமத்திற்கு ஆளாகியுள்ளனர். எனவே தங்களின் எரியும் பிரச்சினைகளுக்கு தீர்வு வழங்க வேண்டும் என்பதே அவர்களின் கோரிக்கையாகும். தேர்தலில் போட்டியிடப் போவது யார்? சில அரசியல் கட்சிகளின் அரசியல்வாதிகள் தேர்தலை நடத்த நினைத்தால், இந்தத் தருணத்தில் தேர்தலை நடத்த மக்கள் குரல் எழுப்பியுள்ளார்களா? அது அப்படியல்ல. தேர்தலை நடத்த பெரும் தொகையை செலவிட வேண்டியுள்ளது. மேலும், அரசு திட்டமிட்டுள்ள அனைத்து வேலைகளையும் ஒத்திவைத்து தேர்தலை நடத்துவதற்கு அதிக நேரம் செலவிட வேண்டியுள்ளது. எனவே, இந்தத் தருணத்தில் தேர்தலை நடத்துவது எந்தப் பலன்களையும் தரப்போவதில்லை. ஒருவேளை, சில அரசியல் கட்சிகள் நாடாளுமன்றத்தில் தங்கள் எண்ணிக்கையை அதிகரிக்கத் திட்டமிட்டு மேற்கொள்ளும் முயற்சியாக இருக்கலாம்

அர்ஜூன்