நல்லிணக்கத்துக்கு விரோதமான வகையில் மனித உரிமைகள் பேரவை செயற்பாடுகள்

கொவிட்-19தொடர்பான சவால்களைபொருட்படுத்தாமல், சட்டச்சீர்திருத்தம் உட்பட தேசியசெயன்முறைகளின் மூலம் நல்லிணக்கம் மற்றும்மனித உரிமைகளை மேம்படுத்துவதற்கானஇலங்கையின் அர்ப்பணிப்பை உலகின்தென்பகுதியில் உள்ள அரசுகள் அங்கீகரித்திருப்பதாகவெளிவிவகார அமைச்சு சுட்டிக் காட்டியுள்ளது.

ஐ.நா மனித உரிமைகள் பேரவையின் 49ஆவது கூட்டத் தொடர் நடைபெற்று வரும் நிலையில், இலங்கை விவகாரம் இரு தடவைகள் பேரவையில் கலந்துரையாடப்பட்டிருந்தது. 46/1தீர்மானத்தை மேற்கோள் காட்டி 'இலங்கையின் பொறுப்புக்கூறல் திட்டத்தை' மனித உரிமைகள் பேரவை நிறுவியுள்ளது.

ஐக்கிய நாடுகளின் மனித உரிமைகளுக்கான உயர்ஸ்தானிகர் அலுவலகத்திற்குள் உள்ளகத் திறன் விருத்திப் பயிற்சியாக மட்டுமே இருக்க வேண்டிய செயலானது, தன்னிச்சையாக ஒரு திட்டத்தின் நிலைக்கு உயர்த்தப்பட்டு, ஐக்கிய நாடுகளின் மனித உரிமைகள் பேரவையின் ஏனைய வெளிப்புற வழிமுறைகளுடன் பட்டியலிடப்பட்டுள்ளது.

இந்த செயற்பாடானது  நல்லிணக்கம் மற்றும் மனித உரிமைகளை முன்னெடுப்பதை இலக்காகக் கொண்டு, தொடர்ச்சியான தேசிய செயற்பாடுகளை ஆரம்பித்து நடைமுறைப்படுத்துவதில் இலங்கை அரசாங்கம் தீவிரமாக ஈடுபட்டுள்ளதொரு தருணத்தில், அனைத்துக்கும் விரோதமான நடவடிக்கைகளே ஜெனீவாவில் இடம்பெற்று வருகின்றன என்று அமைச்சு சுட்டிக் காட்டியுள்ளது.

ஐக்கிய நாடுகளின் மனித உரிமைகளுக்கான உயர்ஸ்தானிகர் அலுவலகம் 'பொறுப்புத் திட்டம்' ஒன்றை நிறுவுவதானது அதன் ஆணையை மீறுவதாகக் குறிப்பிட்டு, சாட்சியங்களை சேகரிப்பதில்  ஐக்கிய நாடுகளின் மனித உரிமைகளுக்கான உயர்ஸ்தானிகர் அலுவலகத்திற்கு அமைக்கப்பட்டுள்ள வகிபாகத்தை உலக நாடுகளின் சில பிரதிநிதிகள் ஏற்றுக் கொள்ளவில்லை. மூன்று மில்லியன் அமெரிக்க டொலர், பிராந்தியத்தில் இந்த ஆணையின் அதிகப்படியான செலவு குறித்தும் கருத்து தெரிவிக்கப்பட்டிருந்தது.

இலங்கை விவகாரம் தொடர்பில் ஐ.நா மனித உரிமைகள் பேரவையின் ஆணையாளர் நாயகம் எழுத்துமூல அறிக்கையை சமர்ப்பித்திருந்ததை அடிப்படையாகக் கொண்டு கலந்துரையாடல்கள் இடம்பெற்றிருந்தன.

49ஆவது அமர்வு தொடர்பில் முழுமையான திருப்தி அடைவதாக வெளிவிவகார அமைச்சர் பேராசிரியர் ஜீ.எல்.பீரிஸ் தெரிவித்துள்ளார்.

இது தொடர்பில் விளக்கமளித்துள்ள அவர் பின்வருமாறு குறிப்பிட்டிருந்தார்.

“உயர்மட்டப் பிரிவின் போது ஏழு நிமிடங்களுக்கு ஒரு முறையும், பின்னர் ஊடாடும் உரையாடலில் ஐந்து நிமிடங்களும் சபையில் இரண்டு முறையும் உரையாற்றும் வாய்ப்பு எனக்குக் கிடைத்தது. வரையறுக்கப்பட்ட நேரத்தில் குறிப்பிட்ட ஐந்து விடயங்கள் குறித்து நான் சபை உறுப்பினர்களின் கவனத்தை ஈர்த்தேன். முதலாவது சமநிலை மற்றும் விகிதாசாரத்தின் கேள்வி - உலகின் தற்போதைய சூழ்நிலையில், ஐரோப்பாவில் பொங்கி எழும் போரை உள்ளடக்கியது, இது நியாயமானதா மற்றும் இந்த அளவு நேரத்தையும் கவனத்தையும் ஆற்றலையும் இலங்கைக்கு ஒதுக்குவது நியாயமானதா? நாம் அமைதியான நாடு. இலங்கையின் நிலைமைக்கும் அது பெறும் கவனத்திற்கும் இடையில் தெளிவான விகிதாசார பற்றாக்குறை உள்ளது.

இரண்டாவது விடயம், இந்த ஊடாடும் உரையாடலின் நோக்கம், சபையின் 49வது அமர்வில் ஐ.நா மனித உரிமைகளுக்கான உயர்ஸ்தானிகர் சமர்ப்பித்த அறிக்கையை பரிசீலிப்பதாகும். அறிக்கையின் மேலோட்டமான ஆய்வும், அதில் 85சதவீதம் தற்போதைய பிரச்சினைகளில் உள்ளது என்பதை தெளிவாகக் காட்டுகிறது.

பயங்கரவாதத்திற்கு எதிரான போருடன் இதற்கு எந்தத் தொடர்பும் இல்லை, ஆனால் உள் இயல்புடைய விஷயங்களைப் பற்றி பேசுகிறது. மேலும் இந்த விடயங்கள் பாராளுமன்றம் மற்றும் இலங்கை அரசாங்கத்தின் பொறுப்புகளுக்குள் நான்கு சதுரங்களாகும். அரசியலமைப்புச் சீர்திருத்தம், அதிகாரப் பகிர்வு, நிர்வாக சேவை மற்றும் அமைச்சுக்களின் செயலாளர்கள் நியமனத்தின் உரிமை மற்றும் முறையற்ற தன்மை போன்ற விடயங்கள் உள்நாட்டு அதிகார வரம்பிற்கு உட்பட்டவையாகும், அவை மனித உரிமைகள் பேரவையின் செயல்பாடுகள் மற்றும் பொறுப்புகளுடன் எந்தத் தொடர்பும் இல்லாதவை.

மூன்றாவது புள்ளி, பாகுபாடு பற்றிய ஒரு கேள்வி தெளிவாக உள்ளது. ஐநா அமைப்பின் 196உறுப்பு நாடுகளின் உள்நாட்டு விவகாரங்கள் தொடர்பாக ஐநா மனித உரிமைகள் பேரவையின் ஆணயாளர் மற்றும் மனித உரிமைகள் கவுன்சில் இந்த மாதிரியான விசாரணையை தொடங்கினால், அதன் விளைவு என்னவாக இருக்கும் என்று நான் கேட்டேன். அது ஏற்கத்தக்கதா? எவ்வாறாயினும், மனித உரிமைகள் ஆணைக்குழு மற்ற நாடுகளின் அத்தகைய விசாரணையை ஒருபோதும் சிந்திக்காது, பின்னர் ஏன் இலங்கையை தனிமைப்படுத்த வேண்டும்? இது தேர்ந்தெடுக்கப்பட்ட சிகிச்சையாகும், இது ஐ.நா அமைப்பின் ஸ்தாபகக் கொள்கைகளுக்கு எதிரானது.

நான்காவது விடயம் இலங்கை மீதான விசாரணைக்காக பாரியளவு செலவு செய்தமையாகும். உலக மக்கள்தொகையில் பாதி பேர் உயிர்காக்கும் தடுப்பூசிகளை அணுகுவதற்குப் போராடும் சூழ்நிலையில் உலகம் இப்போது உள்ளது. பல மக்கள் ஒரு தடுப்பூசி கூட பெறவில்லை. அந்தச் சூழ்நிலையில்தான் மனித உரிமை ஆணையம் இந்த விசாரணைக்கு, சாட்சியங்கள் சேகரிக்கும் பொறிமுறை என்று சொல்லப்படுவதற்கு, மில்லியன் கணக்கான டொலர்களை செலவு செய்கிறது. இந்தப் பணிகளில் நியமிக்கப்படும் மற்றும் ஒப்படைக்கப்படும் அதிகாரிகளுக்கு பெரும் சம்பளம் வழங்கப்படுகிறது. தற்போது கிடைக்கும் வரையறுக்கப்பட்ட வளங்களை நியாயமான முறையில் பயன்படுத்துவது நியாயமானதா? இது பொதுவாக மனித இனத்தின் நலனுக்கு உதவுமா?

ஐந்தாவதும் இறுதியுமான விஷயம், இந்தச் செலவின் விளைவு என்ன என்பது. இது ஏதாவது நன்மை செய்கிறதா? மாறாக சர்வதேச சமூகத்தை பிளவுபடுத்துவதன் மூலம் பாரிய தீங்கையே செய்து வருகின்றது. ஒவ்வொரு ஆறு மாதங்களுக்கும் ஒரு வாய்வழி புதுப்பிப்பு மற்றும் எழுதப்பட்ட அறிக்கை உள்ளது. இவை அனைத்தும் சர்வதேச சமூகத்தை பிளவுபடுத்துகிறது, ஏனெனில் அறிக்கை மீது வாக்குகள் எடுக்கப்படுகின்றன என்பது பற்றியும் தான் எடுத்துக் கூறினேன்”.

இவ்வாறு அமைச்சர் பேராசிரியர் பீரிஸ் சுட்டிக் காட்டியுள்ளார்.

சாட்சியங்களைச் சேகரிப்பதை நோக்காகக் கொண்டு ஐ.நா மனித உரிமைகள் ஆணையாளர் அலுவலகத்தினால் மேற்கொள்ளப்படக் கூடிய செயற்பாடுகள் நாட்டுக்குள் நல்லிணக்கத்தை ஏற்படுத்துவதற்குப் பதிலாக சமூகங்களுக்கிடையில் கசப்புணர்வுகளையும், வெறுப்புக்களையும் தூண்டுவதற்கான வாய்ப்புக்களையே அதிகமாகக் கொண்டுள்ளன என்பதையும் அமைச்சர் தெரிவித்துள்ளார். கலாசார, சமூக மற்றும் பிற வேறுபாடுகளைப் பொருட்படுத்தாமல் உலகின் பிற பகுதிகளில் திணிக்க முயலும் சூழ்நிலைகள் ஜெனீவாவில் உருவாக்கப்படக் கூடாது நல்லிணக்கம் ஒரு உணர்வுபூர்வமான விடயம் என்பதால் வழங்கப்படும் தீர்வுகள் உள்நாட்டு தேவைகளுக்கு ஏற்றவாறு உருவாக்கப்பட வேண்டும்.

கடந்த ஆண்டு செப்டெம்பர் மாதம் ஜெனிவாவில் நடைபெற்ற மனித உரிமைகள் பேரவைக் கூட்டத்தொடரில் இலங்கைக்கு எதிராக சர்வதேச நீதிமன்றங்களிலும், பல்வேறு நாடுகளின் நீதிமன்றங்களிலும் பயன்படுத்தப்படும் என எதிர்பார்க்கப்படும் 120,000சாட்சியங்கள் தமது அலுவலகத்தில் இருப்பதாக ஆணையாளர் நாயகம் தெரிவித்திருந்தார்.

இந்த 120,000சாட்சியங்கள் என்ன என்பது எமக்குத் தெரியாது, இது நியாயத்தின் அடிப்படைக் கொள்கைகளுக்கு முற்றிலும் எதிரானது. ஒரு குற்றச்சாட்டு இருந்தால், அதை யார் செய்கிறார்கள், எந்த ஆதாரத்தின் அடிப்படையில் குற்றச்சாட்டு உள்ளது என்பதை நாம் தெரிந்து கொள்ள வேண்டும். ஆனால் இலங்கைக்கு எதிரான குற்றச்சாட்டுகள் பெயர் தெரியாத நபர்களிடம் இருந்து வருகிறது.

ஆதாரங்களை ஆய்வு செய்யவும், வடிகட்டவும், நம்பகத்தன்மை மற்றும் துல்லியத்தை சோதிக்கவும் எங்களுக்கு வாய்ப்பு இல்லை. குற்றச்சாட்டுகள் பாரபட்சமாக இருக்கலாம், துரோகத்தால் தூண்டப்படலாம். அவை புறம்பான நோக்கங்களுக்காகப் பயன்படுத்தப்படலாம்.  ஆனால் இந்த ஆதாரங்கள் என்று அழைக்கப்படுபவை பற்றிய எந்தத் தகவலும் எங்களுக்கு வழங்கப்படாததால், எங்களிடம் எதையும் கண்டறிய எந்த வழியும் இல்லை.

இருந்தபோதும் ஐ.நா மனித உரிமைகள் பேரவையுடன் தொடர்ந்தும் ஒத்துழைப்புடன் செயற்படுவதற்கு அரசாங்கம் தயாராகவுள்ளது. பயங்கரவாதத் தடைச்சட்டத்தில் திருத்தத்தைக் கொண்டுவருவது உள்ளிட்ட உடனடி நடவடிக்கைகள் பலவற்றை அரசாங்கம் முன்னெடுத்து வருகின்றது. இவ்வாறான முன்னேற்றகரமான நடவடிக்கைகளை சர்வதேசம் கவனத்தில் கொள்வது தேவையானது. இதனை விடுத்து மறைமுகமான நிகழ்ச்சி நிரலுக்கு அமைய தொடர்ந்தும் இலங்கை மீது குற்றச்சாட்டுக்களைச் சுமத்துவதற்கு சர்வதேசம் எத்தனிப்பது ஏற்புடையது அல்ல என்றும் வெளிவிவகார அமைச்சர் பீரிஸ் குறிப்பிட்டுள்ளார்.

சம்யுக்தன்