‘பத்மாவத்’ படத்தை திரையிட அனுமதி | தினகரன் வாரமஞ்சரி

‘பத்மாவத்’ படத்தை திரையிட அனுமதி

சித்தூர் ராணி பத்மினியின் கதை ‘பத்மாவத்’ என்ற பெயரில் நடிகை தீபிகா படுகோனே நடிப்பில் இந்தி உள்ளிட்ட மொழிகளில் திரைப்படமாக எடுக்கப்பட்டுள்ளது.

இந்த படத்துக்கு ராஜபுத்திர வம்சத்தினர் இடையே எழுந்த எதிர்ப்பு காரணமாக பல்வேறு மாநிலங்களில் தடைவிதிக்கப்பட்டது. சென்சார் சபையும் அனுமதி மறுத்துவிட்டது. இதனால் படத்தின் பெயர் ‘பத்மாவத்’ என்றும் காட்சிகளில் மாற்றம் செய்தும் சென்சாருக்கு அனுப்பப்பட்டது. இதையடுத்து சென்சார் சபை அனுமதி வழங்கியது.

எதிர்வரும் 25- ஆம் திகதி ‘பத்மாவத்’ படம் நாடு முழுவதும் திரையிடப்படுகிறது. தற்போது மீண்டும் எதிர்ப்பு கிளம்பியதால் ராஜஸ்தான், குஜராத் மாநில அரசுகள் இந்தப் படத்தை திரையிட தடை விதித்து உத்தரவிட்டுள்ளன. அரியானா, மகாராஷ்டிரா, கோவா, மத்தியப்பிரதேசம் உள்ளிட்ட மாநிலங்களும் தடைவிதிக்க பரிசீலித்து வருகின்றன.

இந்த தடையை நீக்க கோரி பத்மாவத் படத்தின் தயாரிப்பாளர் சார்பில் உச்ச நீதிமன்றில் வழக்கு தொடரப்பட்டது. மத்திய தணிக்கை குழுவினர் அனுமதி அளித்த பிறகும் பத்மாவத் படத்துக்கு மாநில அரசுகள் தடை விதிப்பது சட்டவிரோதம். எனவே தடையை நீக்க வேண்டும் என்று தயாரிப்பாளர் தரப்பில் கூறப்பட்டது.

தலைமை நீதிபதி தீபக் மிஸ்ரா, நீதிபதிகள் ஏ.எம்.கன்வில்கர், டி.ஒய்.சந்திரசூட் ஆகியோரை கொண்ட அமர்வு ஜனவரி 25-ம் திகதி நாட்டில் உள்ள அனைத்து மாநிலங்களிலும் பத்மாவத் படத்தை திரையிட அனுமதியளித்து உத்தரவிட்டது.

சட்டம்- ஒழுங்கை பாதுகாக்கும் பொருட்டு இந்தப் படத்தை திரையிட தடை விதித்து முன்னர் குஜராத், ராஜஸ்தான் மாநில அரசுகள் வெளியிட்டிருந்த அறிவிக்கைக்கு (நோட்டிபிகேஷன்) தடை விதித்த நீதிபதிகள். இவ்விவகாரம் தொடர்பாக இனி வேறெந்த மாநில அரசுகளும் அறிவிக்கை வெளியிடவும் தடை விதித்துள்ளனர்.

மேலும், சட்டம்- ஒழுங்கை பாதுகாக்க வேண்டியது அந்தந்த மாநில அரசுகளின் கடமை என்றும் சுட்டிக்காட்டிய நீதிபதிகள் இவ்வழக்கின் விசாரணையை வரும் மார்ச் மாதத்துக்கு ஒத்திவைத்தனர்.

Comments